الأسطورة الحية محمد علي كلاي
إقرأ للآخر...
ما هو أضخم حدث رياضي علي الاطلاق؟
بعد ما محمد علي كلاي اتمنع من ممارسة الملاكمة واتسحب منه لقب بطل العالم في الوزن التقيل بسبب رفضه التجنيد في حرب ڤيتنام ، بياخد رخصة ملاكمة تاني ويبدأ يلعب ملاكمة تاني في سن 31 سنة تقريباً ويحقق بعض الانتصارات البسيطة لحد ما أخد فرصة المنافسة علي لقب بطولة العالم في الوزن التقيل ضد چو فريزر في مباراة أطلق عليها لقب مباراة القرن، خلاص بقي سنين ظلم و بلا دخل مادي وحاجة زي الزفت وفي فرصة أخيرا كل ده يخلص في مباراة العالم كله تقريبا مستنيها!!
ومع الأسف محمد علي يخسر المباراة بإجماع الحكام في الجولة رقم 15 !!
الحقيقة أنا لما بحاول ابص للأمور بعين محمد علي ببقي محتار هو كان شايف إيه !! انت اتظلمت واتغلبت وكبرت في السن وخلاص لقب البطولة اللي اتاخد منك ظلم خسرته! خلاص ! مفيش كسرة ولا هزيمة أكتر من كده..
بسبب بقي اختلاف وجهات النظر ده وأنا من بعدها مبقتش شايف محمد علي كملاكم خالص، بس الراجل ده كان الموضوع بالنسبة له أكبر بكتير جدا من الملاكمة كلها، أنا مش من أنصار إن الارادة والثقة بالنفس والكلام الفارغ ده، بس حقيقي هو كان جواه حاجة بتقول إنه الملاكمة هي وسيلة تقدمة للعالم عشان يتكلم عن كل ظلم أو استبداد ضد السود في العالم كله تقريباً وضد القتل وافتراء الدول علي بعضها وضد الأديان زي الإسلام، وانا رغم إني حافظ لقاءات محمد علي كلها في التليفزيون والصحافة وأي وسيلة إعلام تقريبا عن ظهر قلب، لكن أنا فاكر كويس إني مكنتش فاهم هو بيعمل إيه تاني حقيقي بعد الماتش ده !! ولا عارف أفسره تفسير منطقي !!
بعدها يلعب مجموعة ماتشات اصغر نسبيا ، ويكسب كذا بطل سابق و يقرر أنه عايز ينافس تاني علي لقب بطولة العالم، بعد الخسارة الفادحة في المرة السابقة !! ، ينافس مين بقي !!
بطل العالم وقتها كان اسمه جورج فورمان، سنه 23 سنة ( فرق سن 10 سنين بينهم ) خد بطولة العالم مرتين !!! لعب 40 مباراة !! كسبهم كلهم !! 37 مباراة منهم بالضربة القاضية في الجولة التانية !!! واطول مباراة في الـ 40 كانت 5 جولات !!!
ولتوضيح الصورة اكتر چو فريزر اللي غلب محمد علي في الجولة الـ 15 ، اتغلب من فورمان بالضربة القاضية في الجولة التانية بس !!!
أنا نفسي خفت وأنا بكتب الكلام ده تاني أقسم بالله!!!
الماتش ده انتحار !! مفيش مقارنة في القوة ولا السن ولا رصيد المكسب والخسارة، فورمان كان ملاكم حقيقي مخيف، يكفي إنك تعرف إن الراجل ده خد بطولة العالم في الملاكمة وهو سنة 45 سنة تاني !!!
كل وسائل الإعلام والمشاهير حذروا محمد علي من الماتش ده وفي لقاءات اقسم بالله إني حافظ وقتها بالتاريخ والقناة وكل شيء ، حتي فورمان نفسة كان مقرر إنه يقتل محمد علي في الماتش ده لأنه مفيش وسيلة هتخلي الناس تترعب منه أكثر من إنه يقتل ملاكم سابق في الحلبة يعني !!
اللي كان غريب أكتر من ده إن محمد علي يطلب إن الماتش يكون في زائير !! زائير بتاعتنا في إفريقيا هنا!! ، واحدة من أفقر دول العالم ، ولما فورمان رفض فضل يستفزه لحد ما وافق!! ، أنا بردة مش فاهم هو بيعمل إيه وإشمعنا زائير!!
أطول prefight build up في التاريخ !! كانت للماتش ده !! أكتر من سنة كاملة !!
لك أن تتخيل إن من الفقر زائير كلها مفيش فيها حلبة ملاكمة دولية !! فيعملوا الحلبة في استاد كورة !! والحاجز بين الجمهور والحلبة كان سور بشري من قوات الجيش الزائيري والعالم كله بينقل أحداث بطولة العالم من دولة بهذا الفقر ( الملاكمة وقتها كانت الرياضة الشعبية الأولي في العالم وقتها مش الكورة )
محمد علي قعد شهرين قبل الماتش في زئير وعمل لقاءات وحوارات صحفية كتير وعادة الفترة دي بتكون فترة إرهاب نفسي للخصم زي انك تتصور وانت بتتمرن أو تظهر قوتك أو أي حاجة من دي، ولكن علي العكس الفترة دي كانت كلها كلام عن زائير وحياة الناس وفقرهم وهما حبوه أوي لأنهم ولأول مرة في حد بيتكلم عليهم ( واعتقد محدش عملها بعده ) وانا عندي مكتبة ضخمة جدا من كل صور محمد علي في زائير ولكن أحبهم لقلبي الصورة دي!! هو كان ماشي في الشارع والعدد الغفير ده من الناس جنبه ومعاه عشان بس يشوفوه بلا حراس ولا أي حاجة علي غير المعهود وقتها وفي اتوبيس معدي ومش عارف يمشي من الزحمة قام طلع وقف في الشباك وأتصور كده وهو بيسمعهم بيهتفوا باللغة المحلية للبلد "Ali, bomaye" ، علي، اقتله! وبالمناسبة ده اشهر هتاف في تاريخ الرياضة علي الاطلاق واتعمل اغاني كتير جدا بلغات كتير جدا زي ما هو كده بالزائيري!
يتحدد ميعاد الماتش يوم الأربعاء، 30 اكتوبر 1974 في عاصمة زائير واستاد بيتكون من 60 ألف متفرج، ويبدأ واحد من أعظم الأحداث الرياضية في التاريخ علي الاطلاق، بطولة العالم في الملاكمة للوزن التقيل بين محمد علي كلاي أصغر بطل عالم في تاريخ الملاكمة وقتها ضد الأسطورة جورج فورمان من عاصمة زائير!!
استراتيجيه محمد علي للماتش ده كانت شيء في منتهي الغرابة الحقيقة حتي علي خبراء الملاكمة نفسهم الراجل 90% من الوقت ضهرة للحبال ومخبي وشه وفورمان طايح فيه زي التور!!
محمد علي قال بعده إنه كان مقرر يتعب فورمان من كتر ما يضرب مش من كتر محمد علي نفسه ما يضربه !! و من وقت للتاني يبدل ويجيب فورمان علي الحبل ويطلع بمجموعة وقدر يصمد علي الحال ده 6 جولات !!
لحد ما في الجولة السابعة فورمان يحط هوك شمال مميت في وش محمد علي مباشرة!! والمفاجأة إن محمد علي كان رده علي الضربة اللي عمرها ما خيبت قبل كده دي إنه زعق في ودن جورج وقاله "is that all you got ?! "
تخلص الجولة السابعة في حالة صدمة شديدة من جورج فورمان المرهق للغاية ومحمد علي يشاور للجمهور يهتفوا باسمة الهتاف الخالد Ali, bomaye وتبدأ الجولة الثامنة
وبعد ثواني قليلة محمد علي يفاجيء جورج فورمان بمجموعة في غاية القوة يقفلها بأحلي شمال في يمين حصلت في تاريخ الملاكمة كلها ويتاخد الصورة التانية اللي حقيقي مرسومة علي قلبي رسم كده ❤️❤️
محمد علي وهو بيضرب فورمان ضربة مباشرة جدا جدا وتعبيرات وشة الجميلة جدا وشكل وش فورمان وهو المية بتخرج منه وكأنه بينفجر ❤️❤️
ليسقط جورج فورمان لأول مرة في تاريخة بضربة قاضية ليفوز محمد علي ببطولة العالم للمرة التانية علي التوالي في تاريخة علي الأسطورة جورج فورمان بالضربة القاضية ❤️
كل تفاصيل اللحظة دي أنا فاكرها وحافظها كأني كنت هناك مع إن الماتش ده قبل ما أنا اتولد ب 20 سنة !!
لسه فاكر المعلق اللي صوته اتنبح وهو بيقول ويكرر
" Muhammad Ali has won. Muhammad Ali has won by a knockout, by a knockout "
من الكلمات اللي عمرها ما راحت من وداني كلمات محمد علي بعد الماتش ده، وما ترجمته الآتي " علي الجميع أن يصمت الآن ، أخبرتكم من قبل حينما هزمت سوني ليستون ( بطل ملاكمة سابق ) إني الأعظم علي الإطلاق ، وأخبركم الآن بأني مازلت الأعظم علي الإطلاق ، وأنه فقط بقدرة الله كل شيء يبدو سهل ، حتي جورج فورمان نفسه يبدو بجوارها طفل رضيع، وأني واحد من كل السود وأهل زئير اللي اتظلموا بسبب لونهم أو مازالوا وإني واحد من المسلمين اللي ممكن بردة يكونوا اتظلموا بسبب دينهم، معركتي الأكبر لم تكن الملاكمة ولا حتي لقب بطل العالم بلا منازع، معركتي الأكبر كانت في رفض الظلم والمساواة والعدل" ❤️❤️❤️❤️❤️
وكل وسائل الإعلام العالمية بتنقل الكلام ده من داخل أفقر دول افريقيا، زائير ❤️
شوية أرقام بقي عن الماتش
الماتش شافه 25% من سكان كوكب الأرض ( عدد سكان الأرض وقتها كان 4 مليار ) ، الكلام ده كان وقت التلفزيون الأرضي أبو أريال اللي مبيتظبطش ده 😅 ولا نت ولا يوتيوب ، حضر الماتش 60 ألف متفرج!
اتعمل مزاد خيري بعد الماتش بكل متعلقات محمد علي، ووقتها اتباع الـ gloves بتاعه بـ 800 ألف دولار ، ليكون إلي وقتنا هذا أغلي منتج في تاريخ شركة ever last للمنتجات الرياضية !!
اجمالي ملابس علي ( لو أنا مش غلطان في الحسابات ) اتباعت باكتر من 1.3 مليون دولار وقتها، وكل الفلوس دي راحت لأهل زئير !! وعلي فكرة دي ميزانيات دول وقتها مش أرقام صغيرة خالص!!
من الحاجات اللي فطرت قلبي لما محمد علي مات كان كلام جورج فورمان عنه علي قناة CBS الرياضية تاني يوم وفاته بالظبط وهو بيعلق علي الماتش وبيقول ما ترجمتة الآتي " كانت لدي رغبة عارمة لقتل محمد علي، وفعلت لذلك كل شيء يمكنني فعلة، حتي في الجولة السابعة لما إصابته إصابة مباشرة ، فوجئت بيه بيصرخ في ودني وبيقول، أهذا كل ما تستطيع فعله؟! حينها أدركت أنني في المكان الخاطيء مع الرجل الخاطئ ( ودمع دمعات كانت أرق ما يُبكَي علي ميت )، وقال ، كون إنك نقول إن محمد علي كان أفضل ملاكم علي الاطلاق ده تقليل من شأنه !! الملاكمة كانت مجرد شيء محمد علي عمله !! وهو ولا شك كان أعظم إنسان أنا عرفته في حياتي )
السؤال اللي حقيقي بسأله لنفسي لما بسمع عن محمد علي الله يرحمه (( هو إحنا محتاجين إخلاص قد إيه عشان نأثر في الناس كده ؟! حتي بعد ما نموت ؟! )) وللأسف الإجابة بتكون دائما إننا نحتاج المزيد من الإخلاص ، هو إخلاص ولا ثقة بالنفس ولا إرادة ولا حاجة !! إخلاص لله وحده في عمل أي شيء ذو أثر !!
أنا بحتفل باليوم ده يوم ( the rumble in the jungle ) من يوم ما وعيت علي الدنيا ، من بتاع 20 سنة كده !! بس المرة دي طعمة مختلف تماماً مع إنه فات عليه 46 سنة كاملين !!
إلي محمد علي، ربنا يرحمك ويسكنك الجنة وشكرا إنك عايش جوايا رغم إن في ناس كتير حواليا بيتكلموا وبيمشوا وبيشوفوا ولكنهم والله ماتوا من زمان، أحسبك إن شاء الله من أهل الجنة ❤️ وربنا يلحقني بيك قريبا علي خير 💚💚
30.10.1974 ( The Rumble in the Jungle)
30.10.2020 ( The Rumble still in the Jungle! ) ❤️❤️
#MuhammadAli
#RumbleInTheJungle
#WhatIFightFor ❤️
إرسال تعليق